Kal shab tha ajab deed ka manzar mere aaghe - Ahmed Faraz

Kal shab tha ajab deed ka manzar mere aaghe !
Duniya thi na hone ke baraabar mere aaghe !

Jaise mutalatim ho samandar mere andar,
jaise ho koi maah-e-munawar mere aaghe !

Us waqt na thi aankh jhapakne ki bhi fursat,
Ik shaher-e-tilismaat tha yaksar mere aaghe !

Us waqt na tha dil ko dhadkne ka bhi yaara,
Ik aalam-e-hairat tha saraasar mere aaghe !

Khuddam ba-hargaam liye jaam-e-istaara,
Lab basta kanizaan-e-saman bar mere aaghe !

Laaye koi meena-e-mae tund lapak kar,
Rakh de koi taazeem se saghar mere aaghe !

Chhup chhup ke koi chust karae tang qaba ko

Hans hans ke utaare koi zewar mere aaghe !

Ik mast adaa kakul-e-mushkeen ko bikhere,
Le aai daf-o-chang utha kar mere aaghe !

Jaise ho mere saamne shaddad ki jannat,

Jaise ho sanam khana-e-aazar mere aaghe !

Jaise koi gul chehra pari chham se utar aaye,
Aur raqs kare naaz se aa kar mere aaghe !

Shola sa badan zulf ki makhmal main lapete,
Jaise ho koi khwab sa paikar mere aaghe !

Yun jaise ke jaadu sa jagaata chala jaaye,
Ik aafat-e-jaan fitna-e-mehshar mere aaghe !

Yaaqoot se lab saru sa qad raat si aankhein,
wo jaan-e-qayamat thi mere ghar mere aaghe !

Wo kaifiyaat-e-dil thi ke behzaad ka fun kya,
Hafiz ki ghazal bhi thi farr-o-tarr mere aaghe !

Aye gardish-e-dauraan zara aahista qadam rakh,
Ye saa'at-e-guzraan hai ghadi bhar mere aaghe !

Aae mausam-e-hijraan abhi kuch der tawaqqaf,
Aana hai to aa jana taher kar mere aaghe !

Aasoodagi-e-qurb ki aazaa shikaani se,
Hai neend mein gaafil mera dilbar mere aaghe !

Aye subh-e-judaai abhi ruk jaa ke sitamgar,
Aise bhi na jage the muqaddar mere aaghe !

Shayad ke 'faraz' aaj kisi roop nagar se,
Aai hai qaza bhes badal kar mere aaghe !

~ Ahmed 'Faraz'

Qaid-e-gham-e-hayaat se humko chhudaa liyaa - ‘Shamim’ Karhani

Qaid-e-gham-e-hayaat se humko chhudaa liyaa,

Achchha kiya ke aap ne apna banaa liyaa !

Hone diya na hum ne andheraa shab-e-firaaq,

Bujhne laga chiraag to dil ko jalaa liyaa !

Duniyaa ke paas hai koi is tanz ka jawaab ,

Diwaana apne haal pe khud muskuraa liyaa !

Chup hoon tumhaara dard-e-muhabbat liye huye,

Sab poochte hai tum ne zamaane se kyaa liyaa !

Kyaa baat thi ke khalvat-e-zahid ko dekh kar,

Rind-e-gunaahgaar ne sar ko jhukaa diyaa !

Na qaabil-e-bayaan hai muhabbat ki lazzaten,

Kuchh dil hi jaanta hai jo dil ne mazaa liyaa !

Roz-e-azal padi thi hazaaron hi neymatein,

Hum ne kisi ka dard-e-mohabbat utaa liyaa !

Badhne lagi ji talki-e-gham-e-haa-e-zindagi,

Thoda sa baada-e-gham-e-janaan milaa liyaa !

Waqif nahin giraft-e-tasawwur se wo ‘Shamim’,

Jo ye samajh rahe hain ke daaman chhudaa liya !

~ ‘Shamim’ Karhani

Ishq-e-butaan ka le ke sahaara kabhi kabhi ~ ‘Arsh’ Malsiayani

Ishq-e-butaan ka le ke sahaara kabhi kabhi,

Apne Khuda ko hum ne pukaara kabhi kabhi;

Aasooda-e-Khaatir hi naheen matmah-e-wafa,

Gham bhi kiya hai hum ne gawaara kabhi kabhi;

Is intehaa-e-tark-e-muhabbat ke ba-wajood,

Hum ne liya hai naam tumhaara kabhi kabhi;

Tufaan ka khauf hai abhi shayad karishma-kaar,

Aata hai samne jo kinaara kabhi kabhi,

Tanhaa-ravi ne rak’khi humaare junoon ki laaj,

Go ahl-e-kaarwan ne pukaara kabhi kabhi;

Ab kya kahein dil-e-mutalavvin-mizaaj ko,

Aksar ye aap ka hai,humaara kabhi kabhi;

Paiham sitam se ishq ki taskeen ho na jaaye,

Aye dost iltifaat Khudaa-ra kabhi kabhi;

Fariyaad-e-gham se ‘arsh’ sambhalta hai dil magar,

Lete hain ahl-e-dil ye sahaara kabhi kabhi..!!!

~ ‘Arsh’ Malsiayani

--------------------------------------------------------------------------

Aasooda-e-Khaatir = Khushaali ke liye

matmah-e-wafa = Wafa ki chaahat

dil-e-mutalavvin-mizaaj = Wo dil jiska mizaj humesha badalta ho

Paiham _{= Humesha, lagataar}

Iltifaat = Rahem

Ye bhi kya ghar hai, barbaad bhi, aabaad bhi - ‘Asghar’ Gondavi

Hai dil-e-nakaam-e-aashiq mein tumhari yaad bhi,
Ye bhi kya ghar hai, barbaad bhi, aabaad bhi;

Dil ke mitne ka mujhe kuchh aur aisa gham nahin,
Haan magar itna, ke hai is mein tumhari yaad bhi;

Kis ko ye samjhaaiye nairang-e-kaar-e-aashiqui,
Tham gaye ashk-e-musalsal, ruk hai fariyaad bhi;

Seeney mein dard-e-muhabbat raaz ban kar rah gaya,
Ab wo haalat hai ke kar sakte nahin faryaad bhi;

Phaad daloonga gareeban, phor daloonga apna sar,
Hai mere aafatkade mein kais bhi farhaad bhi

Kuchh to ‘Asghar’ mujh mein hai, qaayam hai jis se zindagi,
Jaan bhi kahte hain is ko aur unki yaad bhi;

~ Hazrat ‘Asghar’ Gondavi

Haaye logon ki karam-farmaaiyaan - Kaif Bhopali Sahab

Haaye logon ki karam-farmaaiyaan,

Tohmatein, badnaamiyaan, rusvaaiyaan;

Zindagi shaayad isi ka naam hai,

Dooriyaan, majbooriyaan, tanhaiyaan;

Kya zamaane mein yun hi kat’ti hai raat,

Karvatein, betabiyaan, angraiyaan;

Kyaa yahi hoti hai shaam-e-intizaar,

Aahatein, ghabraahatein, parchhaiyaan;

Ek paikar mein simat kar rah gayeen,

Khoobiyan, zebaiyaan, raanaiyaan;

Zakhm dil ke phir hare karne lageen,

Badliyaan, barkhaa rutein, purvaiyaan;

“Kaif” paida kar samandar ki tarah,

Vus’atein, Khamoshiyaan, gahraiyaa....!!!

~ ‘Kaif’ Bhopali Sahab 

Ghazal ke saaz uthaao badi udaas hai raat - Firaq Gorakhpuri

Ghazal ke saaz uthaao badi udaas hai raat

Nawa-e-‘Mir’ sunaao badi udaas hai raat

Nawa-e-dar mein ik zindagi to hoti hai

Nawa-e-dard sunaao badi udaas hai raat

Udaasiyon ke jo humraaz-o-humnafas the kabhi

Unhein na dil se bhulaao badi udaas hai raat

Jo ho sake to idhar ki bhi raah bhool pado

Sanam-kadey ki hawaao badi udaas hai raat

Kahein na tum se to fir aur kis se jaa ke kahein
Siyaah zulf ke saayo badi udaas hai raat

Padaa hai saaya-e-gham jab hayaat-e-insaan pe

Wo dastaan bhi sunaao badi udaas hai raat

Abhi to zikr-e-sahar doston hai door ki baat

Abhi to dekhte jaao badi udaas hai raat

Suna hai pahle bhi aise mein bujh gaye hain charaag
Dilon ki khair manaao badi udaas hai raat

Diye raho yun hi kuchh aur der haath mein haath
Abhi na paas se jaao badi udaas hai raat

Koi shumaar bhi rakhti hain zilmatein ki tahein

Bataao gham ki ghataao badi udaas hai raat         

Koi kaho ye khayaalon se aur khwabon se

Dilon se door na jaao badi udaas hai raat

Karo jo gaur to radd-o-qubool yaksaan han

Dilon se nikli duaaon badi udaas hai raat             

Yagaangi ho ki deewangi ho sab dokha

Suno sab apne paraayo badi udaas hai raat         

Samet lo ki bade kaam ki hai daulat-e-gham

Isey yun hi na ganwaao badi udaas hai raat         

Basey huye hain kisi ke jo lams-e-rangeen ka

Wo bistarey na lagaao badi udaas hai raat           

Isi khandahar mein kuchh diye hain tutey hui

Inheen se kaam chalaao badi udaas hai raat        

Liye huye hain jo beetey ghamon ke afsaane

Wo zindagi hi bulaao badi udaas hai raat             

Bharam nashaat-o-tarab ke na aur khul jaaye

Mai-o-ayaag badhaao badi udaas hai raat            

Do-aatshaa na banaa de usey nawa-e-‘Firaq’

Ye saaz-e-gham na sunaao badi udaas hai raat   

~ ‘Firaq’ Gorakhpuri

Duniya mein kaun kaun na yak baar ho gaya - Khwaja Mir Dard

Duniya  mein kaun kaun na yak baar ho gaya
Par munh phir is taraf na kiya us ne jo gaya

Phirti hai meri khaak, saba dar-ba-dar liye
Aye chashm-e-Aashkbaar,  yeh kya tujh ko ho gaya

Agaah is jahaan mein nahin ghair be khudaa(n)
Jaaga wahi udhar se jo mund aankh so gaya

Tufaan-e-nooh ne to dubaai zameen Faqat
Main Nang-E-Khalq Saari Khudaai Dabo Gaya

Barham kahin na ho gul-o-bulbul ki aashti
Darta hoon aaj baagh mein woh tund khu gaya

Waaiz kise daraawe hai yum-ul-hisaab se
Giriya mera to naama-e-aamaal dho gaya

Phulenge is zabaan mein bhi gulzar-e-maarfat
Yaan main zameen-e-Sher mein ye tukhm bo gaya

Ayaa na aitdaal par hargiz mazaaj-e-dahr
Main garche garm-o-sard-e-zamaana samo gaya

Aye ‘Dard’ jis ki aankh khuli is jahaan mein
Shabnam ki tarha jaan ko apni wo ro gaya

~ Khwaja Mir ‘Dard’